The Birth of Christ, as told in Gullah

Jedus Bon

¹ Een dat time, Caesar Augustus been de big leada ob de Roman people dem. E mek a law een all de town een de wol weh e hab tority, say, “Ebrybody haffa go ta town fa count by de hed an write down dey nyame.” ² Dis been de fus time dey count by de hed, same time Cyrenius de gobna ob Syria country. ³ So den, ebrybody gone fa count by de hed, ta dey own town weh dey ole people been bon.

⁴ Now Joseph same fashion gone fom Nazareth town een Galilee. E trabel ta de town nyame Bethlehem een Judea, weh de ole people leada King David been bon. Joseph gone dey cause e blongst ta David fambly. ⁵ E gone fa count by de hed, an Mary gone long wid um. She gage fa marry um. An Mary been spectin. ⁶ Same time wen dey been dey, time come fa Mary gone een. ⁷ She hab boy chile, e fusbon. E wrop um op een cloth wa been teah eenta leetle scrip an lay um een a trough fa feed de cow an de oda animal dem, cause Mary an Joseph beena stay weh de animal dem sleep. Dey ain been no room fa dem eenside de bodin house.

De Shephud Go fa See de Chile Jedus

⁸ Now some shephud been dey een de fiel dat night time. Dey beena stay dey, da mind dey sheep. ⁹ Den one angel ob de Lawd appeah ta um. De night time done lightnin op jes like day clean broad. Cause ob dat, de shephud dem mos scaid ta det. ¹⁰ Bot de angel tell um say, “Mus dohn feah! A hab good nyews. Cause ob dis nyews, oona gwine rejaice. All de people gwine rejaice tommuch. ¹¹ Right now, dis day, a Sabior done bon fa oona. E de Promise Chile, Christ, de Lawd. An e bon een David town! ¹² A gwine tell oona wa oona gwine see dey, an cause ob dat, oona gwine kno A done tell oona de trute. Oona gwine find de chile wrop op een cloth wa been teah eenta leetle scrip, an e been leddown een a trough.”

¹³ All ob a sudden, a heapa oda angel fom heaben been longside dat angel. Dey all da praise God, say,

¹⁴ “Leh we gii glory ta God een de mos high heaben.
Leh dey be peace ta dem een de wol wa hab God fabor!”

¹⁵ Den de angel lef um an gone back ta heaben. An de shephud dem say ta one noda, “Leh we go ta Bethlehem fa see dis ting wa happen oba dey. De Lawd esef done sen e angel fa tell we.”

¹⁶ So de shephud dem mek hace an gone ta Bethlehem fa see. Wen dey git dey, dey find Mary an Joseph an de chile, an dat chile been leddown een a trough. ¹⁷ Atta de shephud shum, dey done tell ebrybody bout de chile. Dey tell um all wa de angel done say consaanin um. ¹⁸ An all de people de shephud dem tell been stonish. ¹⁹ Mary memba all dis ting an study bout um. ²⁰ De shephud dem gone back ta dey fiel. Dey da praise God. Dey da rejoice tommuch fa all dey done see an yeh. All wa de angel done tell um, e stan jes like e say.

From De Good Nyews bout Jedus Christ wa Luke Write, chapter 2.